- 60 -

1450. September 6.

Wir Conrad von gottis gnaden Herczog In Slezien zcur Olssen vnd Kozil etc. Thun kunth und bekennen offintlich mit dezim briue vor allen die en sehen horen adir lezen, das vor vns gestanden hot der wolnamhafftige vnsir lieber getrawir Nicolaus Lynz von Glowatschaw vnsir obirster Schreiber wolgesunt an leibe vnd synnen. vnd hat mit woluorbedachtim mute gutten willen vnbetwungen vnd vnbetrogin recht vnd redlichen vorkawfft vff eynen rechten wedirkawff vnd yn dem selbigen kowffis weize vff gelossen vnd uffgeben czehen marg czinsis guttir Bemischer groschen vnd polnischer czal vor hundirt marg grosschen Bemischer muntcze vnd polnischer czal obingnant, die wir em mit zampt vnsirm lieben Brudir herczog Conraden dem Jungen Weissen vor seyne dinste vorschreben vnd gegeben haben yn vnd vff vnsirm obirsten gerichte zcu Matiskirche yn vnsirm Kozlischen weichtbilde gelegin, dem wirdigen hern Nicolao Apte des Closters zum Rauden vnd seyner ganczin zampnunge des selbigen Closters Rauden, die obingnant hundirt marg grosschen gancz vnd gar Nicolao Lynz obingnant durch den vorgnant hern Niclase Apt gancz vnd gar beczalit sindt wurden Also bescheidenlichen das der obingnant herre Apt vnd seyne nochkomenden Epte mit zampt seyner zampnunge des egenanten Clostirs Rauden soliche obingnant czinse nemlich czehen marg grosschen Czins fordern heben vnd haben sullin an alle hyndernis noch laute vnd ynnehaldunge des forigen briues, den wir mit zampt vnserm lieben Brudir obingnant dorrobir gegebin haben, von vns vnsir nochkomen fursten vnd vnsir amptleutin doselbist vngehyndert Idach also das wir vnsir nochkomen fursten die losunge ken den obingnant hern Apte vnd seyme Closter obingnant thun mogin mit hundirt marg grosschen obingnanter muncze vnd czal wenne wir des zcu rathe werden, dach vnschedlich vorsessin czinsen noch wachen czal. Des zcu Orkunde vnd bessirer Sicherheit haben wir vnsir segil an dezin brieff lossen hengen. Gegebin zcur Kozil am Sontage vor vnsir lieben frawentage Natiuitatis Noch gottis geburt vierczenhundirt vnd donoch yn dem fumffczigsten yore. Dobey sindt vnsir lieben getrawen Augustyn Iezer, die czeit hewptman zcur Kozil, Hanus Pritwicz Hoyer gnant, Heynrich Dyalosch von Kobelicz, Steffke Slawikowsky, Mantyna von Twardaw, Tame Walch von Esilsdorff, Heyncze Czornberger von Galewicz vnd ander fil erber der vnsir.

Das Siegel ist zerbrochen.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 2, Urkunden der Klöster Rauden und Himmelwitz, der Dominicaner und Dominicanerinnen in der Stadt Ratibor. Hrsg von dr. W. Wattenbach, Breslau 1859.